Asiyadan və Avropadan rəsmi qonaqlar

AZƏRBAYCAN PREZİDENTİ İLHAM ƏLİYEV KOREYA RESPUBLİKASININ BAŞ NAZİRİ HAN SIN SUNUN BAŞÇILIQ ETDİYİ NÜMAYƏNDƏ HEYƏTİNİ QƏBUL ETMİŞDİR

Azərbaycan Respublikasının Prezidenti İlham Əliyev mayın 19-da Koreya Respublikasının Baş naziri Han Sın Sunun başçılıq etdiyi nümayəndə heyətini qəbul etmişdir.
Dövlətimizin başçısı ölkələrimiz arasında əlaqələrin bütün sahələrdə uğurla və sürətlə inkişaf etdiyini vurğuladı. Prezident İlham Əliyev son illər Azərbaycanla Cənubi Koreya arasında səmərəli əməkdaşlığa nail olunduğunu qeyd etdi. Dövlətimizin başçısı ümidvar olduğunu bildirdi ki, Koreya Respublikası Baş nazirinin ölkəmizə səfəri və imzalanan mühüm sənədlər əlaqələrin daha da genişlənməsi işinə töhfə verəcəkdir.
Baş nazir Han Sın Su Koreya Respublikasının Prezidenti Li Men Bakın ən xoş arzularını və səmimi salamlarını dövlətimizin başçısına çatdırdı.

Qonaq Azərbaycan Prezidenti İlham Əliyevin rəhbərliyi ilə ölkəmizdə sürətli iqtisadi inkişafın getdiyinin şahidi olduqlarını vurğuladı. Qarşılıqlı əməkdaşlığımızın uğurla inkişaf etdiyini deyən Han Sın Su bildirdi ki, imzalanmış sənədlər Azərbaycan-Cənubi Koreya münasibətlərinin yaxşı göstəricisidir. O, ticarət sahəsində əlaqələrin son bir neçə ildə sürətlə genişləndiyini və bunun gələcəkdə də davam etdiriləcəyinə əminliyini vurğuladı.
Dövlətimizin başçısı Koreya Respublikasının Prezidentinin salamlarına görə minnətdarlığını bildirdi, özünün də salamlarını ona çatdırmağı xahiş etdi.

AZƏRBAYCAN PREZİDENTİ İLHAM ƏLİYEV AŞPA-NIN MONİTORİNQ KOMİTƏSİNİN HƏMMƏRUZƏÇİLƏRİNİ QƏBUL ETMİŞDİR

Azərbaycan Respublikasının Prezidenti İlham Əliyev mayın 19-da AŞPA-nın Monitorinq Komitəsinin həmməruzəçiləri Andres Herkeli və Yevgeniya Jivkovanı qəbul etmişdir.
Görüşdə Azərbaycanla AŞPA arasında əməkdaşlığa və həmməruzəçilərin ölkəmizə səfəri ilə bağlı müxtəlif məsələlərə dair fikir mübadiləsi aparıldı.